juni 15, 2018
fan Julius Troschel*
Yn deselde oere berne
mei ferskil fan nacht en dei,
sa libben Amphion en Zethos,
beide stribben rjochten nei
en namen wraak foar it ferlerne.
Zeus wie harren heit, syn soannen
hiene in prinses as mem,
dy’t Antiope hie as namme,
yn it libben sûnder stim,
man Dirke spile op as hoanne.
Antiope waard slavinne,
wat as straf beskôge waard
foar beide broers har stribjend libben;
’t hat ta wraak en moarden laat,
in bolle soe ’t fan Dirke winne.
Amphion en Zethos waarden
kening, hast oan Zeus allyk,
en bouden om de stêd in muorre;
wankend rôp it deaderyk,
se rûnen oer deselde paden.
* Julius Troschel (1806-1879)
Plakette ‘Amphion en Zethos’
juni 14, 2018
fan Auguste Oleffe*
De wolken hâlde ’t skynsel tsjin
en sille gau fan kleur fersjitte,
want de dei lûkt nei de jûn,
sa is no ienkear it ferrin
fan dagen mei ’t berûne swurk,
dêr’t âlde fiskers noch mei sitte.
Hy sit rjochtop en skôget fier,
noch fierder as de skiere kimen,
dêr’t it byld fan earder riist
fan fiskers moarns al ier yn ’t spier:
it heljen wie syn deistich wurk,
foar him mei ’t jeiend swurk te rimen.
Sy hat al mannich stoarm trochstien
wannear’t de weagen him besprongen,
har benearen yn de jûn;
de eagen binne faak tichtdien,
har bea gie troch it grauwe swurk…
nêst him heart sy de ingels sjongen.
* Auguste Oleffe (1867-1931)
Skilderij ‘Libbensjûn’