juni 17, 2018
fan Paul Cézanne*
fan Pablo Picasso**
Besjoch de werklikheid, lis fêst
wat yn de holle kommen is:
de foarmen kubus, kegel, bol,
de kleuren soargje foar de rêst,
dat is it dan sa’n bytsje wol.
Cézanne rûn dêrby foarop
en lei it Frânske lânskip fêst
mei eagen rjochte op ’e foarm,
it wie kubisme yn de dop,
dy’t briek, wat late ta in stoarm.
Picasso naam in grutte stap
mei dames fan it lichtste soart
út Avignon, al goed yn foarm,
it wie foar him gjin bleate grap,
mar hiel de keunstwrâld sloech alarm.
Besjoch de keunst sa’t hy it seach,
ienfâldich en fierhinne bleat,
dan komme foarmen op dy ôf
dy’t hingjen bliuwe foar it each,
in komposysje, hecht fan bou.
* Paul Cézanne (1839-1906)
Skilderij ‘Mont Sainte-Victoire’
* Pablo Picasso (1881-1973)
Skilderij ‘Les Demoiselles d’Avignon’
juni 16, 2018
fan Elias van den Bossche*
It giet fier boppe myn ferstân
út wat der allegearre bard
is sûnt wy oan de tafel ieten,
ik kriich it plak oan Jezus’ rjochterhân…
mar ha ik my hjoed ward?
’k Bin mei syn mem nei boppen gien,
har soan hong doe al oan it krús,
ik hear noch hoe’t se súntsjes gûlde,
tegearre ha wy earst op ôfstân stien…
wa fielt him dêr no thús?
Ynienen hearden wy syn stim,
fan boppen ôf seach hy ús oan,
syn eachopslach sil ’k nea ferjitte.
Tsjin my sei hy: ‘Sjedêr, dit is dyn mem.’
Tsjin har: ‘Dit is jo soan.’
It giet noch boppe myn ferstân
wat sein is boppe Golgota,
’t gefoel sprekt fan in hechte bân.
* Elias van den Bossche (sirka 1600-1620)
Ets ‘Kristus oan it krús’