augustus 16, 2018
fan Vincent van Gogh*
Twa flitsen,
tuskentroch it skilderij,
oranje ûnder, blau fan boppen,
ik ferbylde ’t my,
want hearde him net roppen.
Twa tellen
duorre ’t kleurige portret
om efkes stil fan te genietsjen,
byld, mear hoegde net,
fan binnen klonk it lietsje.
Twa wjukken
flitsten by de reiden lâns
as bliksem parallel oan ’t wetter,
trije kear de kâns,
myn flecht koe amper better.
* Vincent van Gogh (1853-1890)
Skilderij ‘Iisfûgel’
augustus 15, 2018
fan Hendrick Bloemaert*
As froulju hearre wy derby
en fierden mei it Wikefeest,
de earste fruchten fan it lân,
mar hjoed, ik kin der noch net by,
it wie as krigen wy de geast.
Wy wiene op itselde plak,
ynienen hearden wy in lûd
dat wiisde op in sterke wyn,
hoewol’t wy sieten ûnderdak…
der wie gjin sprake fan yn noed.
It kaam noch frjemder op ús oer:
in fjoer en flammen dêrút wei,
op elkenien ferskynde ien;
wy wiene rekke troch it fjoer,
it wiisde ús in nije wei.
Wy praten frjemd en troch elkoar
as brûkte elk in oare taal,
doe hearden wy: ‘It is de Geast
foar jimme, mar ek foar de oar!’
It wiisde op in âld ferhaal.
* Hendrick Bloemaert (1601/1602-1672)
Skilderij ‘It delkommen fan de Hillige Geast’