augustus 25, 2018
fan ûnbekend*
Doe’t Petrus spriek, wie ik derby,
ien fan de withoefolle
dy’t nei him harken op it plein,
dêr’t hy it boadskip brocht mei fjoer
en ’t lûd fan wyn, foar my wie ’t nij,
dus wêrom dan net djipper dolle?
Ik waard ek doopt en gie mei har
dy’t Petrus langer koene,
de minsken heinden my doe op;
elk joech syn eigendommen oer
en makken sa foargoed de kar
foar Jezus, wat wy logysk fûnen.
Wy diele mei elkoar it brea
en jouwe oan de minsken
wêr’t sy wiswier ferlet fan ha;
de timpel jout ús libben stjoer,
grif heart de Heare nei ús bea…
ha wy as mienskip dan noch winsken?
* Sarkofaach ‘Mienskiplik miel fan de earste kristenen’
augustus 24, 2018
fan Jacopo Tintoretto*
Kin de dochter fan in poarperwever
oars as weevje lykas heit?
Ut triedden wei ûntstiet in kleed,
dat wat fan it karakter seit.
Moast Arachne nei it heechste stribje
troch goadinnen nei te dwaan?
Athena brocht har oan de weet
om har as minske del te jaan.
Mar Arachne keas mei har te striden:
wa koe weevje ’t moaiste kleed?
Sy bylde Zeus beskamsum út,
hy pakte froulju oeral beet.
’t Skeat Athena yn ’t ferkearde kielsgat,
heechmoed kaam út trie nei trie;
Arachnes kleed waard ta beslút
ferskuord, de spoel sloech dat it die.
As de dochter fan in poarperwever
heger wevet as it kin,
dan dôvet se it libben út
en transformearret yn in spin.
* Jacopo Tintoretto (1518-1594)
Skilderij ‘Athena en Arachne’