september 13, 2018
fan Georgij Nikolaevitsj Bibikov*
Heech sil de Sovjet-Uny libje,
Lenins brede ideaal
fan Eastsee oant de Grutte Oseaan;
gjin tsaar sit langer op ’e troan,
elk minske sprekt deselde taal
en sil it ‘grut gelyk’ neistribje.
Fernim de spanning op ’e touwen,
want it giet de hichte yn
om sa it westen te ferslaan:
de wittenskip komt op ’e troan
mei eastewyn en sinneskyn,
de heechste macht is te fertrouwen.
Op twaentweintich kilometer
komt er op it heechste punt,
dêr’t amper lucht te krijen is;
al hymjend klinkt skril fan de troan:
‘Wy Sovjets soargje foar in stunt,
spektakulêrder as tsaar Peter.’
Fernim de spanning fan dy trije,
om’t de fal net djipper kin
as wêr’t de ierde is, ’t giet mis!
De deaden komme op ’e troan,
want Sovjet’s helden hawwe sin,
om’t sy ’t bestean oan ’t witten wije.
* Georgij Nikolaevitsj Bibikov (1903-1976)
Skilderij ‘Loftballon Osoaviachim’
september 12, 2018
fan Maarten van Heemskerck*
Noch nea is ’t ús oerkommen
dat kriminelen naaiden út
troch sletten doarren hinne,
dat elk stie as ferstomme.
Se neamden har apostels
fan Jezus, ek in frjemdenien,
sa’t yn de sel mear binne…
wa koe himsels ferlosse?
Se wiene finzen nommen,
want wûndertekens wiene dien,
dat ek noch yn de timpel…
it sil dy mar oerkomme.
It die al earder bliken:
se kamen út in frjemd sirkwy
en hiene al in stimpel,
grif net dat fan de Griken.
’t Is wier, ik ha net slomme,
ynienen seach ik wol in ljocht,
se seine fan in ingel…
hat dy de sel ûntromme?
* Maarten van Heemskerck (1498-1574)
Gravuere ‘Petrus en de oare apostels wurde
troch in ingel befrijd út ’e finzenis’