september 15, 2018
fan ûnbekend*
Net dat ik folle wizer bin,
mar wat de skiednis ús fertelt,
moat yn de Hege Rie ek klinke,
’t hie foar hjoed teminsten sin,
want moard lost gjin problemen op,
ik moat dêr net oan tinke!
Ik ha wol neitocht oer it folk
dat Jezus earet as in held;
guon binne juster finzen nommen,
stelden harren op as tolk,
’t waard foar de Rie in grut probleem,
it soe ta deastraf komme.
De skiednis kaam troch my oan ’t wurd,
want earder hat dy lieders telt
dy’t foar har eigen eare preken;
ombrocht binne sy troch ’t swurd:
‘Dus lit ús wachtsje, ha geduld,
har delgong wurdt ta teken…
… of bringt dat Jezus-folk Gods Wurd?
Dan wurdt syn boadskip hjir ferteld.’
* Yllustraasje ‘Gamaliël’
september 14, 2018
fan Jean-Francois Detroy*
De opdracht wie foar fyftich helden,
farrend op de ‘Argo’ withoefier,
gjin langstme mear nei ’t folkje thús:
‘Manmachtich binne jim as Argonauten,
helje op it gouden flues!’
De aventoeren dy’t se telden,
wiene net te hâlden op ien hân:
mei froulju, fjochters en frjemd folk,
manmachtich wiene sy as Argonauten,
sjoen troch goaden op har wolk.
De trochgong tusken blauwe rotsen
waard earst hifke mei in rappe do,
doe foer de ‘Argo’ like rap
dertroch, manmachtich hearden Argonauten
achter har de stiennen klap.
Koe lokjend roppen ’t skip dan botse
litte? Orpheus song der dwers tsjinyn,
fersloech sa hiel ’t Sirenefolk,
manmachtich bleauwen sy as Argonauten,
sjoen troch goaden op har wolk.
De opdracht foar de fyftich helden
waard foltôge mei it gouden flues
en langstme nei it folkje thús.
* Jean-Francois Detroy (1679-1752)
Skilderij ‘De fangst fan it gouden flues’