maart 8, 2019
fan ûnbekend*
fan ûnbekend**
Hoefolle kin in minske ha
om rjocht oerein te bliuwen
fan it sintrum oer de grins?
Hy kin ’t net mei de mûle rêde
as er libbet tusken liuwen.
As mantsje út it sljochte folk
koe hy him aardich rêde
mei ’t wurd en oer de grins
fan Grikelân; as mûlryp reedner
hat er faak de striid delbêde.
Hy kaam werom, de stêd hat him
de polityk ynlutsen,
dy’t moreel gie oer de grins:
in wikseling fan macht en ûnmacht,
ûndertusken waard der stutsen.
Yntriges, ballingskip en moard,
foar him wie gjin ûntkommen,
Cicero kriich amper lins;
syn holle wie net mear te rêden,
dat de mûle wie ferstomme.
* Byld ‘Cicero’
** Yllustraasje ‘De ein fan Cicero’
maart 7, 2019
fan Paul Cézanne*
Yn syn hiele hear en fear
sit heit en lêst de krante
fan boppen nei de ûnderkant,
dêr’t hy fier boppe stiet,
hy wit op ’t lêst fan wanten.
Komt baas-heit úteinlik klear,
dan lizze knibbels iepen
foar ’t jonkje dat him noch net stiet,
syn hân is as de slaai…
allinnich ljippen liepe.
Skilder wurde docht wol sear
foar heit yn ’t sakelibben,
gjin sprake fan, de ûnderkant
stiet fier fan boppen ôf,
heit hat nei hichten stribbe.
Yn syn heale hear en fear
sjocht heit úteinlik kanten
dy’t jilde foar syn soan as klant.
* Paul Cézanne (1838-1864)
Skilderij ‘Louis-Auguste Cézanne’
Skilderij ‘Selsportret’