mei 25, 2019
fan ûnbekend*
Jim moatte witte, bêste minsken,
gjinien is oan in oar gelyk,
jim hawwe eigen jeften krigen,
yn de geast is elkenien dus ryk.
Dy rykdom leit net oan de minske,
de Geast komt yn him oan it ljocht,
dat ljocht begjint dan út te strieljen
as dy minske nei syn jefte docht.
De iene sprekt in wurd fan wiisheid,
in oare wurdt de kennis jûn,
in treddenien blinkt út yn leauwe,
alle trije binne geastlik sûn.
De iene makket siken better,
wer oaren kinne wûnders dwaan,
der binne ek dy’t profetearje…
soe de Geast dy jeften dan net jaan?
De iene ûnderskiedt de geasten,
in oare sprekt mear talen goed
of kin de talen krekt útlizze,
wit, de Geast stiet foar de jeften noed.
* Foto ‘Jefte troch de Geast’
mei 24, 2019
fan ûnbekend*
Lit my ’t ferhaal fertelle,
want beskieden is freon Pythias,
dy’t sûnder skuld de deastraf krije soe…
ús freonskip hat de einstreek helle.
In oanslach hied er yn de holle,
sa woe hawwe Dionysios,
tiran fan Syrakuse, mar soks soe
myn freon nea dwaan, der is tefolle…
… al filosofysk troch ús hinne
gien, behalve dan de moardoanslach;
wy tinke inkeld wat der barre soe
as minsken slim tamtearre binne.
As freonen bleauwen wy yn lykwicht,
Pythias mocht earst op sakereis,
ik naam syn plak yn, kaam er net werom,
dan hie ’k de dea as tsjuster útsicht.
Tirannen tinke faak it kweade,
dêrom wie ’kmy en myn freon ferlern,
mar filosofen sjogge ’t libben rom,
’t bleau mei ús freonskip lang yn wearde.
* Yllustraasje ‘Damon en Pythias’