mei 4, 2019
fan ûnbekend*
Jim binne bruorren fan elkoar
yn ’t leauwe oan de iene Hear,
dus jou Him alle eare,
mar gjin broer is oan de oar gelyk,
jim hoege net oer oaren gear.
De iene yt wat er mar wol,
de oare griente en net mear,
se dogge ’t Him ta eare,
tink net by dysels: ik ha gelyk,
dus bin ik better foar de Hear.
Wês foar dyn broer gjin stroffelstien
troch watsto ytst, want dan dochst kwea,
doch goed, dan stiest yn eare
by de minsken; inerlik bist ryk
as leauwe is dyn deistich brea.
Brief fan in Joadsk-Romeinske frou oan Paulus
Bêste Paulus, hoe ha wy it no!
Do hast it hieltyd oer myn broer,
bin ik dan net yn eare?
Ik as frou bin inerlik ek ryk,
dyn manlik skriuwen slaan ik oer.
Yllustraasje ‘Joadske frou’
mei 3, 2019
fan Peter Paul Rubens*
Daidalos en Ikaros
as heit en soan op wjukken
op ’e flecht út Kreta’s Labyrint,
mar kaam de heit fan syn ferline los?
Daidalos wie arsjitekt,
fermoarde syn neef Talos
út jaloerskens, waard as minne fint
ferballe nei it eilân Kreta, krekt…
… doe’t de kening grut ferlet
hie fan in tûke bouwer
fan it Labyrint as finzenis
foar Minotaurus, minskebolle, net…
… lang, hy waard ta dea ferslein;
’t wie min nei ’t sin fan kening
Minos, ek foar Daidalos wie ’t mis:
it Labyrint hie foar de heit gjin ein…
… ek net foar soan Ikaros,
dy’t nei de fûgels kipe,
’t foarbyld fan in konstruktive hint:
mei waaks en fearren komme minsken los…
… fan de grûn… ‘Mar flean net al
te heech, want troch de sinne
raant it waaks, myn soan… do stoere fint
bist heechmoedich… hein him… foar de fal!’
* Peter Paul Rubens (1577-1640)
Yllustraasje ‘De fal fan Ikaros’