juni 22, 2024
fan ûnbekend*
Ezechiël
Ik moast wer profetearje
fan de Heare oer foarst Gog.
God nimt Gog by de leie
en driuwt him út it noarden wei.
De bôge slacht Hy him út
hannen, dat gjin pylk treft doel.
Syn fal komt op ’e bergen,
foar de bisten wurdt er foer.
Dan komt folk Israel foar
’t ljocht en stookt de wapens op.
It sammelet de liken,
dat it lân wer suver wurdt.
It offermiel foar bisten
sil bestean út fleis en bloed.
Sa wurde alle fjochters
wei, brekt oan de Hear syn dei.
* Yllustraasje ‘Symboalyske ûndergong’
juni 21, 2024
fan ûnbekend*
It libben is lykas in wei
dy’t elkenien ôflizze moat,
it giet mei faasje yn ’t begjin,
de ein telt mannich stroffelstien,
wa’t trochset, treft it net sa min.
Sjoch Fortaleza Canyon,
it paad dêrhinne liket flak,
mei faasje giet it yn ’t begjin,
mar mei it tempo is it dien
wannear’t men amper rinne kin.
Wa’t trochset, krijt perfoarst gjin spyt,
sjocht ûnder him syn libben wer:
de stream krijt ûnderoan frij baan,
eroazje djippet út de kleau…
it útsicht sil foldwaning jaan.
* Foto ‘Fortaleza Canyon yn Brazilië’