maart 20, 2020
fan Peter Paul Rubens*
Hektor, wiere held fan Troje,
soan fan kening Priamos,
focht moedich tsjin de Griken,
dêr’t Achilles held fan wie.
Earst koe hy it noch wol roaie
mei Apollo as de god
dy’t de Trojanen stipe,
dat de Gryk wist him gjin rie.
Mar Achilles kaam nei foaren,
sloech der razend wyld op los,
dat Hektor moast doe wike,
wat er net ferwachte hie.
Zeus hie woegen en besletten
oer held Hektors faaie lot,
Achilles hie al slipe
’t swurd, dus Griken ta de die!
Goaden hiene eigen wetten,
Zeus sloech ta, Apollo net,
held Hektor kriich gjin stipe,
waard ta lyk, dat net fergie.
* Peter Paul Rubens (1577-1640)
Skilderij ‘Achilles deadet Hektor’
maart 19, 2020
fan William Turner*
’t Is stil, de seilen hingje slop,
de see leit as in spegel
yn de iere nacht…
de werklikheid komt op ’e kop.
It skip leit al in oere stil
foar anker, tsjin de regel
fan de feart giet troch…
foar David wie ’t syn lêste wil.
Sir David Wilkie, dy’t ferstoar
op see, gie troch foar keunstner,
naam de styl yn acht,
dêr wie er wichtich skilder foar.
Gibraltar baait yn ’t felle ljocht,
de werklikheid fan ’t libben
giet mei gong nachts troch…
wa hat oan David Wilkie tocht?
De reek lûkt stadich nei it lân,
it fjoer glydt oer it wetter,
dat beweecht, want sjoch…
de bier stiet foar it each yn brân.
* William Turner (1775-1851)
Skilderij ‘Frede… begraffenis op see’