april 29, 2024
Kin men de driging noch ferneare
dy’t swier hinget as in flok
foar ’t folk dat gjin skuld hat
oan hiel it wrâldske barren,
oanset troch de hege hearen
boppe alle leed ferheven?
Dat folk sil net yn ’t tsjuster bliuwe,
bûge foar it neare lot,
mar stride foar wat hat
noch takomst foar de ierde,
iuwen oan ’t ferline riuwe,
hjoed moat sa’n feroaring heve.
Dan sil it lânskip grien opljochtsje
fan hoop op mear gelok
as wat de flok jûn hat,
dan sil it wrâldske barren
him net op ’e hearen rjochtsje,
mar it is mei ’t folk ferweve.
april 28, 2024
fan ûnbekend*
fan ûnbekend**
Sjedêr de bôge fan triomf,
dy’t earder bûgde foar ’t geweld,
in swiere tiid fan fjouwer jier,
in skiednis dy’t him faak werhelle:
de Dútsers tsjin de Frânsen.
De opstân fierde nei triomf,
befrijing fan it hiele lân
nei’t de besetter hie in plan
om hiel Parys te ruïnearjen,
lykas it Poalske Warschau.
Mar Charles de Gaulle liet dat net ta,
syn plan hold by de oaren stân:
nei’t hiel Parys yn opstân kaam,
liet hy divyzjes opmarsjearje:
de Frânsen tsjin de Dútsers.
It gie op de oerwinning ta,
sjedêr de bôge fan triomf
dy’t foar de fijân waard ta swier
ferline tiid, al wer werhelling
fan oer de grinzen hinne.
* Foto ‘Parys befrijd’
** Foto Charles de Gaulle’
