mei 1, 2024
fan ûnbekend*
Ezechiël
As minskesoan bisto profeet
en as profeet ek wachter
dy’t it folk warskôget
as de fijân ’t lân oerfalt,
dan blaast er op ’e hoarn.
Asto as minskesoan by need
en tagelyk as wachter
net de hoarn lûd klinke
litst, dan wurdt it ek dyn dea
en giet it folk deroan.
Mar litst as wachter en profeet
it lûd fan need wol hearre
en wol ’t folk net harkje,
dan oerfalt dy net de dea,
mar giet it folk deroan.
Elk minske krijt in eigen kleed
te dragen yn it libben,
fan profeet of minske
dy’t de earen iepen hat
foar ’t klinken fan de hoarn.
* Yllustraasje ‘Hoarnblazer’
april 30, 2024
fan ûnbekend*
‘America first!’
Sa hat de rop al iuwen klonken
fan it folk fan USA:
‘Wy binne ’t bêste lân op ierde,
mei oaren gean wy net yn see!’
‘America help!’
Sa klonk it troch de jierren tritich
hinne, Roosevelt wie ree
om Churchill út ’e brân te helpen,
Amearika stiek mei oer see.
‘America send!’
Sa klonk de gjalp út Oekraïne,
Biden woe wol, hat it wûn
Zelensky út ’e brân te helpen,
Amearika hat wapens jûn.
‘America first!’
Sa klinke op ’e nij de lûden
fan it folk fan USA
mei Trump as arrogante balter:
‘It bêste lân bliuwt op syn stee!’
* Foto ‘Flagge fan USA’