mei 22, 2024
fan ûnbekend*
Ezechiël
De Heare joech my as profeet
syn eigen byld as goede hoeder,
want de skiep dy’t oeral doarmje,
hellet Hy nei Israel werom,
der komt in ein oan harren leed.
Mar komt it swakke skiep yn need
troch tadwaan fan de sterke rammen,
dan sil God de strange rjochter
wêze: ‘Dêrom, sterken, tink derom,
de hoeder hâldt it swakke beet.’
God ropt syn tsjinstfeint David op
om hoeder fan it folk te wêzen,
dat frij wennet yn it eigen
lân, gjinien komt mear fan honger om,
de keppel harket nei syn rop.
* Foto ‘De goede hoeder’
mei 20, 2024
Sy stiene hjoed yn fjoer en flam
meidat de geast har fierder dreau
as Ljouwert út en dan nei Snits,
want alve siet djip yn it brein,
fan stêd nei stêd gie yn in flits.
Sy hearre ta in sterke stam
dy’t yn in knallend tempo leaut
en ûnderweis gjin stimpel mist,
de geast sleept har lûd gûnzjend mei,
oertsjûget elk derfan: dit is ’t!
Sy ha hjoed tsjûge fan de flam
dy’t lôget yn ’t gefoelich hert
by alle alve stêden lâns,
apostels fan de pinksterdei,
de geast hâldt harren yn balâns.