april 1, 2021
fan Juan Gris*
Sjoch no wat ik hjir doch
mei tafel, boek en krante,
se steane skean of foar in part,
sa’t ik it foar mysels besjoch,
men kin it skôgje fan mear kanten.
Sjoch do it fan dyn kant,
dan kinst der mear fan meitsje
as ik der hjir fan makke ha;
dyn fantasy moatst brûke, want
dan silst it hert fan minsken reitsje.
Doch do wat yn de skaal,
yn ’t glês kinst ek wat jitte,
dyn eigen foarkar foar myn part,
dan skriuwst yn ’t boek in blau ferhaal
en wolst wat út ’e krante witte…
… jou sels oan wat noch wearde hat.
* Juan Gris (1887-1927)
Skilderij ‘Fruitskaal, boek en krante’
maart 31, 2021
fan ûnbekend*
Jesaja
De foarst fan Juda, Achaz, wie benaud
foar Syrië en Israel,
twa keningen tsjin him allinne;
triljend as de beammen op ’e wyn,
tocht hy: gjin tinken oan om sa te winnen.
Gjin kening stie de foarst fan Juda by,
mar wol Jesaja, de profeet,
mei wurden om wer moed te winnen:
‘Branhout binne beide keningen,
sis ik, de jiske stoot der samar hinne.’
Wol harkje nei wat ek de Heare seit:
‘Damaskus en Samaria,
dy stêden sille net sa bliuwe,
grutsk, as hjoed de dei, en Israel…
de fijân sil dat folk nei ’t easten driuwe.’
Yllustraasje ‘Achaz’