augustus 19, 2024
Wêr’t it hinne rint of driuwt,
gjinien kin sizze hoe’t it komt,
de takomst lit neat witte
oer wat op it minskdom takomt,
wêr’t men weikomt, is te mjitten.
Wolken is gjin mjitten oan,
feroarje fluch, fan tel oant tel,
ferbyldzje sa de minske,
dy’t dynamysk troch it libben
rint, gjin weet noch hat fan moarn.
Driuw net mei de wolken mei,
dy’t meisleept wurde troch de wyn,
oplosse yn de sinne;
wat de minske takomt, nimt er
mei, de takomst is te winnen.
augustus 18, 2024
fan ûnbekend*
Ferbjustere, de earms fansiden,
stiet er heger as de sleine stêd
troch bommen út ’e hichte wei,
hoewol’t er ’t net op Hitler stean hat,
mei gjin folk sa deadzjend stride.
Hy hat de oarloch jierren skôge,
wit dat Dresden wie in trochfierplak
fan wapens nei it fiere front,
foar Hitler romte om te libjen…
hat de stêd foar dat doel lôge?
Hy koe de deaden amper telle,
fyftichtûzen, mar hy rekke kwyt
de tel mei alle fallen bern…
hat Hitler dêr in trien om litten?
Nazi’s soene ’t net fertelle.
Al jierren stiet hy hjir yn namme
fan de Hear dy’t frede preke hat
foar freon en fijân ûnderweis,
foar Hitler en de alliearden…
ha se har dêrfoar wol skamme?
* Foto ‘Dresden nei it bombardemint’