april 22, 2021
fan Frans van Mieris*
Hjir stean ik, frou Piktura,
ik gean troch foar pikturaal
en stean foar hiel de skilderkeunst,
fertel yn kleuren myn ferhaal.
Ekspresje wol ik suver ha,
wat al sprekt út myn gesicht
en losse toefen hingjend hier,
ik til oan myn palet net licht.
Sân kleuren stean foar alle
tinten op ’e hiele wrâld,
harmoanysk minge is in keunst:
fan kâld nei waarm, fan waarm nei kâld.
Lit Herkules yn ’t neaken
rinne, fan de striid wurdt hy
wol waarm, de skilder is yn ’t spier
foar elke spier, antyk wurdt nij.
Ik doch it glêde masker
foar en bin net wa’t ik bin,
sa is ’t ek mei de skilderkeunst:
troch foarm en kleur krekt echt… nei ’t sin.
* Frans van Mieris (1635-1681)
Skilderij ‘De Skilderkeunst (Piktura)’
april 21, 2021
fan ûnbekend*
Oer de folken sil ik profetearje:
Filistinen, Moäbiten,
folk fan Aram, Etiopiërs
Egyptenaren, folk fan Babel,
Edomiten, folk fan Tyrus,
jim grutskens sil gau slite.
Lit de lytse lju har rêstich deljaan,
want sy ha genôch te iten,
mar heechmoedigen ha gjin bestean
yn ’t eigen lân, sy moatte flechtsje
witwêrhinne, ’t folk fan fierrens
komt del yn harren krite.
* Yllustraasje ‘Leger fan fierrens’
