juni 11, 2021
fan Nicolas Poussin*
As lytse poppe, op ’e flecht,
waard Pyrrhos brocht oer de rivier
nei kening Glaukias, dy’t him opbrocht,
syn aspiraasjes rikten fier.
As kening foel hy altyd oan
en harke net nei wize rie
fan Kineas, dy’t him de frede brocht,
syn aspiraasjes rikten fier.
Hy brocht sels oaljefanten yn
de striid, wat nimmen earder die,
wat de Romeinen yn benearing brocht,
syn aspiraasjes rikten fier.
De sege wie meastal foar him,
mar mei ferlies fan wat er hie
oan krêft, wol wûn er, mar net wat er tocht:
in ryk fier oer de grinsrivier.
* Nicolas Poussin (1594-1665)
Skilderij ‘De jonge Pyrrhos wurdt rêden’
juni 10, 2021
fan Edward Hicks*
Wy binne by jim kommen
om yn frede troch te gean
as Quackers yn dit frije lân,
wy stribje nei in freedsum ryk,
genede is ús deistich lean.
Wy ha hjir altyd wenne,
stribje nei in goed bestean
as yndianen yn dit lân,
wy fiele ús natuerlik ryk,
ha gjin ferlet fan lean en klean.
De dieren binne kommen
sa’t de Hear it hawwe wol:
gjin liuw of tiger fret it laam,
der hearsket frede yn dit ryk,
genede makket magen fol.
Gjin dier hoecht hjir te wennen,
bisten ha har eigen aard,
sawol de tiger, liuw as ’t laam,
gjin dier is oan de oar gelyk,
elk hat op eigen wize baat.
* Edward Hicks (1780-1849)
Skilderij ‘It freedsume keninkryk’