juni 25, 2021
fan ûnbekend*
De ferhâlding wie kompleks
tusken Rhodogoune en Demetrios:
sy wie as keningsdochter troud
mei him dy’t finzen sitten hie
fanwege oarloch mei har heit…
it gie om mear as seks.
Earder wie Demetrios
mei Kleopatra al troud, prinsesse fan
Egypte, dy’t út wraak de kant
keas fan syn fijân, bloedbroer fan
Demetrios, kompleks, mar feit…
wa waard op ’t lêst de klos?
Broer tsjin broer en frou tsjin frou,
’t gie om mear as seks: de eare fan de man
wie mei de wraak fan froulju troud;
Demetrios ferlear de striid
en die himsels tekoart, as breid
hat Rhodogoune roud.
* Yllustraasje ‘Rhodogoune’
juni 24, 2021
fan Jacques-Laurent Agasse*
Dêr stiet er yn syn lange jas
en op it hier de hege hoed,
eksoatysk foar de Arabieren,
dy’t yn rok en mantel stean,
it giet om harren dieren.
Op hege poaten stiet it dier
mei op ’e romp de lange hals,
eksoatysk foar de westerlingen,
dy’t foar ’t allochtoane gean:
in bist mei brike ringen.
It bûcht de kop en jout him oer
oan Edward Cross syn hannelsgeast,
eksoatysk foar de Arabieren,
dy’t fersteld stean fan it bod,
royaal om feest te fieren.
De reis wurdt lang foar de sjiraf
en ûnbekend is it gebiet
dêr’t Cross him oan de adel skinke
sil, sa is it dier syn lot,
dus lit him earst mar drinke.
* Jacques-Laurent Agasse (1767-1848)
Skilderij ‘De Nubyske sjiraf’