mei 31, 2024
fan ûnbekend*
Wêr’t bavianen yn de hichte
slingerje, de sebra’s roffelje
mei feart de flakte oer,
dêr binne kliffen en ravinen,
hat Natoer spektakel stichte.
Oars as it leven fan de minsken,
mei it razen fan de metropoal
bliuwt net in plakje oer
foar ’t slingerjen fan bavianen,
sebra’s ha dêr ek gjin winsken.
De earnen fleane troch de poarte
oer it wetter fan de sterke stream,
’t spektakel fan Natoer
mei alle bavianen, sebra’s…
soe men sûnder harren moatte?
* Foto ‘Blyderivierpoort yn Súd-Afrika’
mei 30, 2024
fan Charles van Beveren*
Hy wie de iennige dy’t siet,
joech oan dat hy ’t net sitten seach
om as kanonnefoer te tsjinjen,
mar syn broer woe troch foar offisier…
wie dat wol wier?
Oproppen troch Napoleon
dy’t him, syn broer, wol sitten seach
om tsjin de Rus de striid te winnen,
hy fertsjinne as in offisier…
mar wie dat wier?
De froulju stiene nei de tút
te praten oer de lange tocht
mei yn de eagen noch de triennen,
dochs joech ’t fiere reizgjen ek fertier…
’t wie wrachtich wier.
Heit joech syn stoere soan de hân,
omdat er lykas him ek tocht
de Frânsman soe it winne kinne
fan de Rus, nei Moskou foar fertier…
mar wat wie wier?
* Charles van Beveren (1809-1850)
Skilderij ‘Ofskie fan in soldaat’