augustus 21, 2021
fan Jesaja*
De Heare hat no dit te sizzen,
Hy dy’t Jakob skepen hat
en stal jûn hat oan Israel:
Loskocht ha Ik hiel myn folk,
dat by de namme neamd is,
sit net yn noed, want it is wis
datst wer yn tel bist.
Al moatsto roch it djipste wetter,
troch rivieren hinne, Ik
bin by dy, fuortspield wurdsto net;
ek al giesto troch it fjoer,
de flammen sille dy net
ferskroeie, troch de Hear wurdst ret,
omdatst yn tel bist.
As lospriis jou Ik trije lannen
dy’t dyn plak ynnimme, want
do bist it wurdich, Israel;
út it easten komme wer
dyn bern, it westen, noarden
en ek it suden litte sjen
datsto yn tel bist.
* Yllustraasje ‘Troch it wetter’
Yllustraasje ‘Troch it fjoer’
augustus 20, 2021
fan Peter Paul Rubens*
Semele,
kreaze keningsdochter,
oantaast troch god Zeus,
rap al swier fan Dionysos,
har begjin wie tsjuster,
oan de ein waard ’t ljochter.
Hera,
Zeus syn frou liet witte,
hy moast syn macht sjen
litte, har troch wjerljocht reitsje,
dus soe sy ferskroeie,
sa it bern ferjitte?
Dionysos
waard úteinlik berne
út ’e bil fan Zeus,
koe syn mem wer libben meitsje,
brocht har nei Olympos
om oan him te wennen.
* Peter Paul Rubens (1577-1640)
Skilderij ‘Zeus en Semele’