augustus 27, 2021
fan Matteo Rosselli*
Goadinnedochter Semiramis
waard ta fûnling lein yn de woestyn
en fûn troch hoeder Simmas,
dy’t har stjoerde ’t libben yn.
Sy waard de frou fan stedshaad Onnes,
troch foarst Ninos die hy him tekoart,
dy’t Semiramis sitten
seach nêst him, syn eigen skat.
Goadinnedochter Semiramis
skonk de foarst in soan, dat wie it dan,
sy seach him net mear sitten
op ’e troan, it kaam derfan…
… dat sy de macht yn hannen krige,
har soldaten oprôp ta de striid;
de folken ha it witten
dat it waard folslein har tiid.
Har tiid soe lykwols ek ferrinne
nei’t de iennichst soan kaam op ’e troan;
as do fleach sy nei heger
sfearen, dat sy is nea stoarn.
* Matteo Rosselli (1578-1650)
Skilderij ‘Semiramis’
augustus 26, 2021
fan Antoon van Dijck*
De eagen rikke nei de hichte,
wylst it burd wiist fierwei del,
wêr kin in muonts de wierheid fine…
is it net de himel, dan de hel.
De rûge streken binne flechtich
doe’t syn kop kaam op papier,
trochskinend ljochtsje op ek letters,
foar it each tichtby mei himelsk sier.
De ynhâld jout in oare lading:
jild, bekend as ’t ierdske slyk,
matearje kin it minskdom bine,
foar de measten is der gjin ûntwyk.
De muonts lykwols hat ea ûnthjitten:
‘Mei maat Earmoed rin ik op,
gjin selskip ûnderweis is better,
ûnder bliuwt yn lykwicht mei de top.’
* Antoon van Dijck (1599-1641)
Skilderij ‘Stúdzjekop fan in muonts’