november 7, 2021
fan ûnbekend*
Yn de krisisjierren tritich
wiene der al twa miljard,
tefolle fûnen wittenskippers,
dus beheine wie de kar.
Net om ’t libben te ûntnimmen
oan earst mar de âlderein,
want soks gie yn tsjin hege wearden,
net begjinne oan de ein.
Wol begjinne by konsepsje,
as der noch gjin libben is,
dus strûp in jaske om de penis,
mei de pil is men ek wis.
‘Casti Connubii’ wie ’t skriuwen
fan de paus: foar it konsept
fan berntsjes, wês dêrom net anty,
nee, de tsjerke hat net slept.
Lit de foetus net foar ivich
sliepe, want hy libbet yn
de mem, wurdt wekker by de berte…
inkeld telle makket blyn.
* Omslach ‘Casti Connubii’
november 6, 2021
fan ûnbekend*
Jesaja
Mei ik de Heare freegje
om sjen te litten dat syn krêft
weromkomt by syn folk
om dat dan te ferheegjen?
Oerein komt dan de Heare
as yn de dagen fan alear,
syn earm lit sjen de krêft
om meunsters macht te kearen.
Jo koene stikken houwe
de meunsters fan de wylde see
en stieken dea de draak
dy’t drige mei syn klauwen.
Hoe’t Jo de see drûch leine,
dat wie in teken fan jo macht
en likegoed de wei
dêrtroch, foar’t folk in seine.
Der komt in ein oan ’t lijen,
wa’t frijkocht wurdt, kin dan werom,
it folk beklimt de Sion
fol freugde nei lang swijen.
Yllustraasje ‘Seemeunster’