juni 14, 2024
fan ûnbekend*
De draken fan de bergen
fjurje dêr har grime út
oer folk yn hierspjeldbochten,
dat net gau skrikt fan gefaar,
sa wurde draken ferge
om te fjurjen op ’e Sanipas.
De pas rint nei de hichte
tusken Drakensbergen troch,
in wei mei hierspjeldbochten
dy’t sjauffeurs útdaagje ta
lavearjen sûnder plichten
as koereurs rap op ’e Sanipas.
Mar wêrom soe men ride
tusken Drakensbergen troch
om oars net waar te nimmen
as de bochten mei gefaar
om fan it paad te gliden…
genietsje fan de Sanipas.
* Foto ‘Sanipas tusken
Súd-Afrika en Lesotho’
juni 13, 2024
fan Juan de Valdés Leal*
Dêr leit er mei de tosken bleat
en eagen djip weisakke,
sjoch de fingers op syn stêf
en teannen dy’t nei boppen stekke,
sa fergiet de gloarje fan de wrâld.
Hy wie ta alles wol yn steat:
de leafde foar syn hûntsje,
ek de oarder oan de stêf
om yn in oarloch ta te stekken,
want it bloed fan oaren liet him kâld.
Wat goed wie of folslein ferkeard,
hy wie de foarst fan ’t oardiel,
wiisde rjochts-links mei syn stêf,
koe neisten yn de hichte stekke,
liet syn fijân bite yn it sâlt.
Dêr leit er yn ferfallen steat,
it kleed oer bleate bonken,
foar it each fan himelsk stêf
mei ’t oardiel oer syn dwaan en litten,
wylst syn geast gjin hege status hâldt.
* Juan de Valdés Leal (1622-1690)
Skilderij ‘Finis Gloriae Mundi’