juni 19, 2024
fan Marten Groenhof*
De reiden wiuwe op in koeltsje,
de beammen rûzje harren liet,
wylst it wetter weaget sûnder lûd
en ’t Fryske jacht leit yn de rêst,
dit is wat de Sânmar sa simmersk biedt.
It koeltsje is in koelte wurden,
de reiden ha har kleur ferlern,
mar it wetter lit de kleuren sjen
fan wolken mei dêrachter ljocht,
dit is hoe’t men de mar sa hjerstmis ken.
In koeltsje kin de lea ferkuolje,
in sterke koelte kringt troch klean,
mar in minskehert bliuwt grif net koel
by ’t skôgjen fan de gong troch ’t jier
by de Sânmar, bliuw dêr mar efkes stean.
* Marten Groenhof (1925-1978)
Skilderij ‘Op de Sânmar’ (detail)
Skilderij ‘By de Sânmar’
juni 18, 2024
fan keunstner út Ruslân
As profeet kriich ik in opdracht
dy’t dûbel op my oerkaam:
tagelyk in opdracht foar de striid,
dêrnei de deastraf… út ’e tiid.
Yn dy tiid kriich Gog de opdracht
as grutfoarst op te tsjen tsjin
Israel mei hiel syn legermacht,
bûnsmaten joegen daliks acht;
folken dy’t it mei him holden,
marsjearren mei syn leger
op mei helm en swurd en spear en skyld
nei ’t lân dat lei foarhinne wyld
derhinne, mar te boppen
is ’t folk úteinlik kommen
dat troch God de Hear útkeazen is…
de tiid fan Israel is wis.
* Yllustraasje ‘Gog fiert syn leger oan’