juli 25, 2022
Korona lei it spul faak plat,
wat wie der dan noch om te spyljen,
fluitsje liet gjin lippe ta,
gjin wize klom de hichte yn,
korona dreau mei ’t folk de spot.
Mar dit jier komt it folk oerein,
it hoecht gjin spul mear te ferbyldzjen,
want it rint no ienkear sa
dat lizzen bliuwe is net yn,
men moat derút, leafst mei de wein.
En wurdt it nacht, dan komt op ’t dak
in tinte om heechop te lizzen,
klimme is der dan ek by
en fluitsje nei in djippe snoark,
de hichte is dêrfoar it plak.
* Foto ‘Sliepe op it dak’
juli 24, 2022
fan ûnbekend*
fan ûnbekend**
Sy waarden beide wrâldferneamd,
mar net omdat hy har op ien hân droech,
wol om de finger oan de trekker,
skot nei skot foar har gewin,
sy ha fan kapitalen dreamd.
De krisis makke ’t útsichtleas
foar beide om te gean foar in bestean
dat mear joech as ienfâldich iten,
harren wie dat fierste min:
‘Wy ha in fin mear as in bears!’
In winkelman kriich earst in klap…
fan Clyde, de flinke dame stie har man,
sy woe har Bonny ymponearje:
‘Sjoch wat ik as frou ek kin,
myn stellen is gjin flauwe grap.’
Nei trettjin moarden, kapitaal
dat telde, kriich de plysje har yn byld,
der klonken mear as tûzen skotten;
rykdom hie foar ’t pear gjin sin
mear nei de ein fan har ferhaal.
* Foto ‘Bonny en Clyde’
** Foto ‘De auto fan it pear nei de besjitting’
