september 12, 2022
Heech stekt er út mei twa gesichten
boppe de seedyk by Harns
en skôget oer it lân en ’t Waad,
dat beide skieden bliuwe,
dêrby hat it minskdom baat.
In goes komt fleanend op ’e hichte
fan wat bart op see en lân,
hat gjin ferlet fan dûbelop,
hy wjukket oeral hinne,
is fleksibel mei de kop.
Wannear’t de see komt út ’e lichte
wei geduerich hegerop,
dan kin de stiennen man neat dwaan,
de goes sil hichte winne
of him nei in peal ta jaan.
september 11, 2022
fan ûnbekend*
fan ûnbekend**
Sy waard op hannen droegen,
keninginne Astrid, de prinses
út Sweden wei,
dy’t sels it folk ek droech
mei aksjes foar de earmen…
oan twa kanten snie it mes.
Spontaan foel Astrid yn de
earms fan Leopold, hy wie de prins
dy’t kening waard
fan België, hy droech
syn leafste ek op hannen…
folop libje wie syn winsk.
Tegearre op fakânsje
krigen sy in ûngelok,
foar har fataal,
wat by de Belgen sloech
yn ’t hert, foaral by earmen…
’t hert dat stilstie, brocht gjin lok.
Sy waard op hannen droegen,
keninginne Astrid, de prinses
út Sweden wei…
doe hold gjin Belch it drûch.
* Foto ‘Keninginne Astrid’
** Foto ‘Keninginne Astrid opbiere’
