september 22, 2022
fan Salvador Dalí*
De geast fan Lenin wjukket
seis kear om de fleugel hinne
wylst de Ynternasjonale klinkt,
de Sovjet-Uny riist nei boppen,
sjoch nei ’t toetseboerd, it blinkt.
De geast fan Stalin wjukket
fierder om de striid te winnen,
mar falsk klinkt de nasjonale toan,
de Sovjets hawwe hurde koppen…
wa wurdt Stalins wrede soan?
De geast fan Poetin wjukket
oer morele grinzen hinne
wylst raketten komme fluitsjend del,
noch mear soldaten wurde roppen
om te stjerren yn syn hel.
* Salvador Dalí (1904-1989)
Skilderij ‘Seis ferskiningen fan Lenin
op in fleugel’
september 21, 2022
fan ûnbekend*
fan ûnbekend**
Jeremia
De Heare seach twa minsken:
de iene wie ferflokt,
omdat syn hert ôfdwaalde,
de oar fertroude op de Hear,
op paden dêr’t syn hert nei taalde.
De ien stie op ’e steppe
en like op in strûk
mei inkeld keale tûken,
de oare stie folop yn blêd,
koe fan de stream it wetter brûke.
De Hear kin ’t hert bedjipje,
it iene is ferdoarn,
it oare liedt ta dieden
dy’t yn de eagen fan de Hear
it goede oan de minsken biede.
Sjedêr in man fan rykdom
dêr’t hy gjin rjocht op hat,
is in patrys op aaien
dy’t hy net lein hat, neat sil hy
op ’t hichtepunt behâlde meie.
* Foto ‘Keale strûk’
** Foto ‘Beam folop yn blêd’
