november 18, 2022
fan ûnbekend*
Sardinië, eilân yn de Middellânske See,
dêr’t heuvels útsicht ha
op weagen fan kristal.
Punta Molentis yn de Middellânske See
as earm nei weagen ta,
se blinke as kristal.
Al fier foar’t letter-folk
ha earms grutsk nei de fierte wiisd:
de weagen tsjinje ús as tolk.
Wy hearskje fierder as
de kust en ha de kym as grins,
de lange earm komt ús fan pas.
Sa stjoere wy berjocht
nei folken ús noch net bekend,
de weagen krije nea har nocht.
* Foto ‘Punta Molentis’
november 17, 2022
fan Francisco José de Goya*
Hjir stean ik dan yn fol ornaat,
Francisco José de Goya,
mei yn de linker it palet,
de rjochter strykt mei it pinseel
de kleuren op it skilderij,
sa kom ik steande op ’t portret.
Myn eagen binne rap paraat
as bûten wat te rêden is
wat my rûch rekket yn it moed,
it drama komt dêrnei op doek,
sa kleurje ik de werklikheid,
dy’t sjen lit wat der floeit oan bloed.
It is net oars, ik kriich as maat
de bril, myn eagen waarden min
fan ’t sjen wat kaam op ’t selde del:
ellinde yn de maatskippij,
dy’t kleure mannich skilderij…
op ierde is it faak in hel.
* Francisco José de Goya (1746-1828)
Skilderij ‘Selsportret yn it atelier’
Skilderij ‘Selsportret’
