Posted by admin

Komt in skûtsje skeind derút,
dan slacht de motivaasje ta,
want wa wol ’t skip net silend ha!
Se skreppe sels dwers troch de nacht
oant ûnderseil de aksje slút.

Sylt Doarp Grou it seil wer skeef
en leit it skûtsje heech en skraal,
dan slút it Lemster skuorferhaal*,
ek mei de lape fan de Pan…
in wite flagge foar op dreef?

Flaggen binne foar it Fean
mei ’t geve túch alhiel yn ’t wyt,
de banen sûnder wryt of slyt,
de skipper dy’t de flagge hyst
mei ’t fûle eachweid fan in earn.

* Sjoch ‘Klapperjende seilen’
oer de twadde dei fan De Lemmer

Wat is in skûtsje sûnder seil?
It sylt allinnich foar de wyn
op ’t fokje mei de loete;
’t hat de gong der net mear yn
en ’t resultaat is ûnder peil.

Noch foar de start trof ’t needlot Grou,
in klap oer stjoerboard en ’t wie dien,
in stikken seil as boete;
dêrnei trof it lot noch ien,
in klap en Snits wie der ek ôf.

De Lemmer mei it lytse doek
joech oan de oaren klap nei klap
en waard as winner groete;
om’t it seil wie wat te krap,
kaam ’t twadde doek boppe de broek.