Posted by admin

De bealich moast derop dy deis,
de Fluezen bearde, liet de seilen klappe,
loeten knapten lykas lúsjefers,
mar trettjin skippen bleauwen ûnderweis,
want skippers hâlde wol fan grappen.

Sa brûsde Siete* by de start
yn trance of foar de show, wyld as in bolle,
tusken rûnfeartboat en syljacht troch:
‘Sjoch, hoe’t dy Sintimeeter fart,
mei ’t reade lapke foar de holle!’

De oare Meeter, Lodewyk,
wat jierren âlder en wat hierren grizer,
seach de reade boeien by Langwar:
‘Dy Lammert rekkenet him al ryk,
mar bûten ’t fjild mei syn bak izer!’

De sjuery frege om bewiis,
mar Lodewyk waard wyt en hie gjin foarstel,
ek gjin skipper dy’t wol tsjûgje woe,
dus hold Langwar de earste priis,
mar tsjûge waard in fototastel.

* Siete Meeter

Skûtsjesilen jout ek winterwurk,
it smoute praat oer hoe’t it wie
en hoe’t it fan ‘e simmer sil,
ynspeksje fan de roef oant durk
en skreppe mei in stielen wil.

Siete*, kampioen fan foarich jier,
wol wis wol witte: dit moat wer,
en hat it skip yn stikken snien,
want langer, dat is wrachtich wier,
sylt flugger, dus nei nûmer ien.

Hattum** lykwols hâldt it sa’t it wie,
syn skip sylt al in fearnsieu mei,
in jubileum mei âld stiel,
wat swierder, dus is ’t wrachtich wier,
gjin blauwe wimpel wurdt syn diel.

Sietes start op Grou is yn it skot,
in gouden sa’t er letter seit,
en sa blinkt ek syn finishplak,
mar ’t hurde stiel is Hattums lot,
in blok falt al yn ’t earste rak.

* Siete Meeter fan Boalsert
** Hattum Hoekstra fan Drachten