september 1, 2024
fan ûnbekend*
Nea wer oarloch, klonk de wrâld oer,
want miljoenen deaden ha de klacht
dat sy massaal te ier ferstoaren
troch de wreedste hân yn neare nacht.
Lit de naasjes har net liene
foar geweld wannear der is ferskil
fan miening, dat sy har feriene
yn ferbining mei de hiele wrâld.
Nea wer ûnrjocht op ’e ierde:
hat in naasje oer in lân in klacht,
dan sil gjin oarloch ’t pleit besljochtsje,
net de sterkste hat de heechste macht.
Lit de naasjes nei De Haach gean
om te redendielen oer ’t ferskil,
dan sil it rjocht fêst as in skraach stean,
folken wurde mei elkoar ferbûn.
* Yllustraasje ‘Feriene Naasjes’
augustus 31, 2024
fan ûnbekend*
It wie in wûnderlike dream
dy’t Daniël klear wekker makke,
seis bylden sette hy op skrift.
In liuw mei wjukken fan in earn
waard optild, moast it sûnder wjukken
dwaan, kriich dêrnei in minskehert.
It twadde byld wie krekt in bear
dy’t trije ribben yn de bek hie:
‘Ala, oerein,’ waard sein, ‘fret fleis!’
In panter mei de rêch fol fear
fan fjouwer wjukken, fjouwer koppen,
de hearskippij waard oan him jûn.
In freeslik bist waard doe ûntbean
mei izertosken en tsien hoarnen,
in bist dat grutske wurden rôp.
It byld fan Ien yn wite klean
mei hier as wol sa blank waard tsjinne
troch folk dat net te tellen wie.
De minskesoan kriich alle ear
wylst hy de blanke Iene skôge,
syn hearskippij giet net foarby.
Yllustraasje ‘Fjouwer bisten yn Daniëls dream’