admin

oktober 15, 2016

Blom en minske

Wat hat de minske mei de blom,
fan oarsprong stom,
mar sprekkend mei in namme:
tongerblom of hynstepoat,
ien fan de lytse soart
of pinksterblom mei flammen
fan wat de minsken earst
belibben as de geast.

It pearse tongerblomke
bloeit ek wol as hynstepoat
en groeit as wie ’t Lyts Tomke
op in nuveraardich oard,
it hat in plak útkeazen,
rinnend faakris op ‘e non
en op ‘e reus syn learzen
óf hoefizers fan beton.

Mar no de pinksterblom,
wat ljochterpears fan tint,
fanwege ’t feest ek from,
it is de geast dy’t wint,
mar as it hurder waait,
dan krijt er ’t geastkleed om:
de minske dy’t him klaait
as plastic pinksterblom.