september 7, 2024
fan ûnbekend*
Daniël
Daniël seach him by ’t wetter stean
en tagelyk wie dêr in raam
mei op ’e kop twa hoarnen,
dêr’t er mei begûn te ramen
oant gjin bist mear op ’e poaten stie,
hy koe foarearst syn gong mar gean.
Ut it westen kaam in geitebok
mei op ’e kop in lange hoarn
dêr’t hy de raam mei stjitte
oant dat bist net langer rame
koe, want beide hoarnen wie hy kwyt,
hy moast werom yn ’t eigen hok.
Mar de geitebok kaam ek yn noed,
syn iene hoarn briek fan de kop,
dêr’t fjouwer oare kamen,
ien dêrfan begûn te ramen,
stjitte út ’e loft wei mannich stjer,
ûnthold de Himelfoarst de groet.
* Yllustraasje ‘Fisioen fan raam en bok’
september 6, 2024
fan ûnbekend*
It hat wat fan in oerwâld
sa’t it ljocht falt yn de grot
mei tûken boppe ’t wetter,
brûzend by it stiente del…
Kimitsu wit wol better.
Kimitsu as de stêd mei
’t park dat pronket mei de grot,
lit de toeristen witte:
’t ljocht skynt mei in gouden hert,
om nea wer te ferjitten.
De grot is eartiids makke
om it rysfjild te foarsjen
fan wetter út ’e hichte;
’t komt der hjoed de dei op del:
it hert wurdt gâns ferlichte.
* Foto ‘Kameiwa-grot yn Kimitsu, Japan’