mei 20, 2023
fan ûnbekend*
Jeremia
De wiisheid dy’t der wie yn Edom
fynt men yn gjin fjilden mear,
dêr’t Ezau eartiids swalke,
dêrom klaait de Hear him út,
bleat stiet syn neiteam tusken folken.
De buorlju sille net mear sizze:
‘Wees en widdo, kom by ús,
elk kin hjir stipe fine.’
Folken laitsje jimme út
en spotte oer jim wiis ferline.
Jim fine hâld heech yn de bergen,
like heech as ’t gierenêst,
jim wurde fûl delhelle;
as in liuw kiest Hy jim út,
jim ha dan neat mear te fertellen.
* Foto ‘Fleanende gier’
mei 19, 2023
fan ûnbekend*
‘Rich Lake tusken beammen
dy’t weagje oer de bergen hinne,’
sa waard songen yn de steat New York,
mar en bosk, twa ierdske memmen.
Sa woe stammem Ierde
ha, libje ûnder jim heit Sinne,
lykwicht is ’t paroal yn de natoer…
koe it minskdom dat ek biede?
Beammen waarden kappe
om foar ’t bouwen hout te winnen,
wat it lykwicht mei de mar ferbriek,
beide memmen krigen klappen.
Poer wie stammem Ierde
op minsken dy’t net bouwe kinne
sûnder ôf te brekken de natoer
dy’t de steat mei beammen sierde.
Mar it byld feroare
mei ’t plantsjen om sa wer te winnen
bosk, de mem fan fûgels yn de beam,
fisken sprieken oan de oare.
‘Rich Lake tusken beammen
dy’t weagje oer de bergen hinne.’
Mar en bosk besongen de natoer
as in koar fan tûzen stimmen.
* Foto ‘Rich Lake yn de steat New York’