Posted by admin

In heale ieu, it jubileum
fan de SKS, dus brûzje mar
mei alle fjirtjin skûtsjes
al yn juny op ‘e Snitser mar,
noch lang net yn ’t museum.

De striid brekt los, wa sil it winne,
wurdt betiid yn ’t jier de kampioen
fan alle kampioenen?
Snits en Ljouwert ha elkoar al fûn,
se brûzje der rap hinne.

De liuw sjit ta en sil him reitsje
boppe-yn, de gaffel tsjin de staach,
de Pan teart nei de weagen,
jout him oer yn noch in fûle flaach
en kin gjin gong mear meitsje.

It jubileum yn it wetter,
dat gjin kampioen der boppe-út,
mar fjirtjin… folle better.

‘Yn de Frijloop’ hiet har ploech,
se wiene frij, mar wol oan ’t wurk
mei ’t swit tsjok op ‘e holle
foar ‘Oeral thús’ fan roef oant durk,
gjin doarpaniel wie har tefolle.

It wie al hast wer twa jier lyn
doe’t ‘Oeral thús’ ferlear de slach
op ’t Grouster wetter fan de wyn.

It doarpaniel gie mei it stiel
de djipte yn, in hiele slach,
it kromme as in skiere iel.

Mei man en macht kaam ’t skip oerein,
it stiel wie hiel, it túch fan slach,
it doarpaniel út lykwicht slein.

‘Yn de Frijloop’ makke rjocht
wat krom wie en út lykwicht slein,
mei ’t swit tsjok op ‘e holle,
dat alle houtwurk wie wer kein,
in twadde kear wie ien tefolle.