mei 22, 2023
Noch fierder hie hy wollen,
mar it slagge amper mear,
want rjochtop stean gie net,
hy rûn mei bûgde holle.
Syn hûd wie oantaast, útslein
troch in skimmel, dy’t him lang
al yn besnijing hie,
syn fraach gie oer de útein.
Mar help koe hy net krije,
dêrfoar wie syn leed net slim
genôch, sa waard der sein,
net ien woe him befrije.
Dus moast er sa mar trochgean,
as de winter nei de ein
rûn, soe it better gean,
mar wa soe dêrfoar ynstean?
Dochs liet er him dit sizze,
’t wie al wer itselde liet
as alle jierren… moast
er him by ’t feit dellizze?
mei 21, 2023
fan ûnbekend*
Wa wist as fikser fan de coelacant?
Net Hendrik Goosen, trawlerkapitein,
dy’t fiske foar de Afrikaanske kust;
hy fong, as wie ’t in oaljefant,
in meunster fan sawat twa meter.
In wittenskipper hie ’t oer in fossyl,
want nea hie men dy fisk yn libben sjoen,
dus wittenskiplik wie dy fangst in lust,
ferlykber mei ’t bestean fan iel,
dy waarden lykwols gjin twa meter.
De coelacant wie foar de wittenskip
in fisk fan grut belang en ek fan striid:
de Frânsen woene ha, ’t wie harren kust
dêr’t coelacanten swommen djip,
se dûkten nei sânhûndert meter.
Faak dûkt de wittenskip ’t ferline yn
en komt wer boppe mei wat libben is,
fan ’t djippe tsjuster nei heech sinneskyn.
* Foto ‘Coelacant’