juni 2, 2023
fan ûnbekend*
Soe de hillige Marije
dy’t har namme oan dit wetter joech
as ljochtsjend foarbyld foar it minskdom,
ymponearre west ha troch dit gea?
It hat faaks mei mystyk te krijen.
Fan twa kanten komme hichten
byinoar, dêrtusken leit de mar
as spegel fan de loft en bergen,
wrâld en himel bringt Marije gear,
dêrtusken hat sy frede stichte.
Mar de wrâld fan wrede bylden
lit ‘The Shining’, film fan horror, sjen
as freeslik foarbyld foar it minskdom,
rolfêst spilet satan it wer klear,
wat foar Marije krinkend fielde.
* Foto ‘Saint Mary Lake’
juni 1, 2023
fan Frans van Mieris*
Mei de linkerhân op ’t boarst,
ticht ûnder ’t klopjend hert,
de rjochter hingjend foar de dokter
wachtet sy op wat hy sizze sil
mei ’t each op har ferlet.
Mei de finger skean omheech,
har pols fêst mei de hân
dy’t brûkt wurdt troch in tinkend dokter,
sjit de diagnoaze troch syn brein…
wat lijen hat sy hân?
Sichtber wie it yn har bloed,
dat heind waard yn de skaal,
hy seach it ek yn de urine
yn de flesse, beide ha him sein,
it wie in leaf ferhaal.
Leafde spriek út bloed en pis,
mar fûler út it hert
dat foar in kreaze jongfeint kloppe,
mar syn hert bleau foar har langstme stil,
hie fierder gjin ferlet.
* Frans van Mieris (1635-1681)
Skilderij ‘Doktersbesite’