Posted by admin

Op ‘e Feanhoop yn de file
as de wyn net wol sa as it moat,
dan is it rak te smel en koart
en kin gjin skûtsje frijút sile.

Letter is it ek net slagge,
giene tûke skippers net frijút,
guon skûtsjes joegen tút op tút,
ek oan it startskip mei de flaggen.

Kuolje moatte hjitte hollen,
mar soks is net sûnder risiko,
in skûtsje hâldt net samar ho,
in lûde tút is ien tefolle.

Op ‘e finish wie gjin file,
mar foar ien en twa* wol skot op skot,
de útslach siet folslein op slot,
se ha noch oeren hottefile.

* De Lemmer en Grou

De striid wie brûzjend op it wetter
mei it skom foar noas en wang
nei ’t paradearjen yn in slang,
it twagefjocht kaam folle letter.

Earst wie de bloedstriid mei de loete,
dy’t ien rekke op ‘e noas,
sa’n slach yntern wie hiel wat oars
as twa protesten mei ien boete.

Nei ’t akkefysje op it liuwke
kaam de striid deun by de wâl,
de Pan sloech ta, it like mâl,
twa boaten krigen in lyts triuwke.

De liuw en Pan ha ’t fûlste striden,
earst op ’t wetter mei protest,
yn ’t swithok folge fluch de rest,
de liuwenoas hold op fan blieden.