juni 16, 2023
fan ûnbekend*
Hy leit op oardel kilometer
fan de kust, de hege rots
sa fêst as de apostel Petrus,
dêr waard op boud ta ear fan God.
De muonts en klúzner ha dêr bidden,
isolearre fan de rest,
beskerme tsjin gefaar en sykte…
wa hie gjin hekel oan de pest?
Mar nei de Frânske revolúsje
kaam in ein oan it gebed,
de prysters waarden finzen setten,
de nije wet foldie har net.
Mont Saint-Michel waard in attraksje
nei’t it wie in finzenis,
toeristen rinne dêr no hinne,
fan drûge fuotten is elk wis.
Foto ‘Mont Saint-Michel’
juni 15, 2023
fan Hieronymus van der Elst*
In foarst soe wol tsien soannen ha,
mar wa wie eins de wiere
dy’t syn plak ynnimme soe
as hy de holle dellei…
njoggen woene dêrop ta.
De heit lei nei ferrin fan tiid
de holle del, de wiere
wie noch net bekend, sadat
de troan foar wiken leech bleau,
dêrnei rûn it út op striid.
It grêf kaam leech, mar heit syn lyk
koe harren net fertelle
wa’t syn plak ynnimme soe,
miskien koe dat de holle,
kriich mei sjitten ien gelyk.
Ien fan de tsien woe dat net dwaan,
want hy koe wol fertelle
wa’t foar heit de wiere wie:
hy liet de skeinde holle
sakje om him del te jaan.
* Hieronymus van der Elst (1600-1650)
Skilderij ‘It skot op it lyk fan de kening’