juli 1, 2023
fan ûnbekend*
Warskôge wie ik troch de Heare,
mar ik wist net wat te dwaan,
hoe kaam ik libben wer oerein
en koe al it ferkearde keare?
In hân fernaam ik, ’t wie de Heare
dy’t my wat te sizzen hie:
‘Oerein, profeet, de delling yn,
dêr sil Ik dy watst dwaan moatst leare.’
Ik seach de gloarje fan de Heare
yn de delling en foel del,
in geast yn my holp my oerein:
‘Do moatst dyn ear nei boppen keare.’
Ik hearde doe de Heare sizzen:
‘Slút dy yn dyn wente op,
dêr wurdsto stiif mei bannen bûn,
bliuwst sûnder oanspraak machtleas lizzen.’
Myn tonge koe ’k net mear bewege,
mar doe spriek de Hear my oan:
‘Dyn mûle sit net mear op slot,
sprek oan it folk op al syn wegen.’
* Foto ‘Hân út ’e hichte’
juni 30, 2023
fan ûnbekend*
Gjin keunstner kin it meitsje:
in ûnbidich skilderij,
bewegend yn de oseaan,
de kleuren sille kenners reitsje.
Miljoenen wolle groeie,
plantsjes mikroskopysk lyts;
wannear’t it wetter waarmer wurdt,
begjint it plankton rynsk te bloeien.
De keunstner sil dus hjitte
Plankton yn massale Bloei,
it doek is dan de oseaan…
wa kin sa’n skilderij ea mjitte?
* Foto ‘Fytoplankton yn de oseaan’