admin

oktober 24, 2016

Alderplicht

Hoe lang fielt men de âlderplicht
en ropt om op it paad te bliuwen
fan jongsôf nei folwoeksenheid,
earst dan op wjukken fuort te driuwen.

It jong hat lang noch net it sicht
op alle risiko’s yn ’t libben
en heart net nei wat wiisheid seit,
hat jong al mei de âlders kribbe.

Sa rûn er op syn eigen paad,
want eigen wiisheid soe him wize
it plak fan de ûneinichheid,
dêr koe syn ego loftheech rize.

Mar út ‘e hichte kaam it skaad
fan wêr’t syn âlders him op wiisden,
syn ego kromp ta lytsichheid,
in griisbûnt protsje siet te grizen.

Hoe soene âlders net de plicht
mear fiele om by need te roppen,
sels middenyn de puberteit,
al kribje se mei hjitte koppen.

oktober 24, 2016

Bibelbylden

fan ûnbekend*

De iere dea fan Alexander
ferdielde hiel syn ryk;
foarst Antiochus Epifanes
kriich de macht, in boal allyk.

Syn legermacht teach nei Egypte,
hy stjoerde ek de float;
striidweinen mei tal oaljefanten
daveren nei ’t fiere oard.

De farao koe it net hâlde,
waard bang en naaide út;
boal Antiochus Epifanes
teach it lân út mei de bút.

Syn legermacht rûn oer de grinzen
fan Israel, kaam foar
Jeruzalem, bestiel de timpel
fan syn ark, ’t wie mear as bar.

Boal Antiochus Epifanes
spriek op oer bút en dea;
oer Israel kaam swier de rouwe,
’t kleien klonk oer hiel it gea.

* Byld ‘Antiochus Epifanes’