juli 17, 2023
It is grif gjin ambysje
sprutend út it minske-aard
om hegerop te kommen,
om te winnen fan de konkurrint,
it goud blinkt boppe ’t sulver út…
mar sy sit hjir op yntuysje.
Noch foar ’t de griene snilen
komme boppe ’t wetter út,
hat sy op yntuysje
deade reiden oanfierd foar har nêst,
ambysje is gjin sprake fan,
nei ’t eigen aard hat sy it spile.
Foar har sil goud net blinke,
aaien lizze oan har hert
om letter út te kommen,
yntuysje soarget foar de groei
en slút de konkurrinsje út,
lit wol har skerpe striidrop klinke.
juli 16, 2023
fan ûnbekend*
As maten út ’e sleurgong brekke
fan de dei dy’t neat te bieden hat,
dan folgje sy de oer-natoer
fan jagers op it grutte wyld
en sjoch wat sy ûntdekke…
… in gat dat maten djipper fiere
sil as nei wat sleur te bieden hat:
de bylden fan de oer-natoer,
de prehistoarje mei it wyld
dat libbe doe op ierde.
De maten ha ’t ferline rekke,
meitsje oan de wrâld de jacht bekend;
histoarysk is de bûnte bút
fan bisten op ’e hurde rots,
in spear stekt nei de nekke.
It folk, dat ek op wylde dieren
jeie wol, ferskynt massaal op ’t plak
dêr’t jagers bylden bisten út;
ûntsnappe as grut risiko
liedt ta in stop ynfiere.
* Yllustraasje ‘Dieren fan Lascaux’
