augustus 7, 2023
Gjin minske kin de bloei oproppe
út ’e djipte fan de feart,
hy rekket earder yn betizing
troch de spegel sûnder dat
de wyn it byld ferbrekt…
wat is ûnder, wat is boppe?
De beammen dy’t de krún opstekke,
dogge dat ek yn de feart,
mar kinne ek gjin bloei oproppe
foar de pompeblêden; foar’t
de wyn it byld ferbrekt,
stekt de minske út de nekke.
Hy sjocht de stoel yn ’t wetter driuwen,
dy’t er foar himsels earst keart
om sittend te genietsjen fan it
byld dat mannich pompeblêd
him biedt, it is dan krekt
oft se bloeiend nei him wiuwe.
augustus 6, 2023
fan ûnbekend*
De Dútsers dy’t ús lân besetten,
namen weet en rogge yn beslach,
wat guon pasjinten better makke.
De dokters stiene foar in riedsel:
hiene de besetters sa’n gesach
dat dieven har genêze koene?
It riedsel wie om op te lossen:
weet en rogge sitte gluten yn,
dêr’t minsken siik fan wurde kinne.
Dus wa’t allergysk is foar gluten,
giet syn hiele libben op dieet,
sa kin er ’t fan syn sykte winne.
De Dútsers dy’t ús lân besetten,
lieten sa de wittenskip in slach
slaan, foar pasjinten koe ’t net better.
* Yllustraasje ‘Glutenallergy’