Posted by admin

It boaze oan ta wynkrêft acht
en twirre oer de oseaan,
kaam doe mei tsien oan yn Biskaje;
de beammen kreunden yn de nacht,
in tal soe tsjin de flakte slaan,
yn alle steaten wie it skaaien.

Hy roeide troch, de fisker mei
syn fangst fan yn ’t begjin noch tsien,
de blierren yn syn stive kloeren;
hy fiske troch oant ljochtskyndei,
mar healwei hied er noch mar ien
en foar de boech noch mannich oere.

Winslow Homer

Se sitte yn Parys of yn Berlyn
en roppe: ”t Is no fiif foar tolven,
op ‘e klokslach komt it klear!’
Se redendiele noch in kear
en proastje mei in glêsfol wyn,
mar litte euro’s oer oan wolven.

’t Is kletse yn har finansjele talen,
tiid genôch om ien foar tolven,
gjin weet fan Israels ferhalen.

It barde yn Jeruzalem yn ’t lân
fan soannen, stammen, altyd tolve,
mei dat tal kaam ’t grif wol klear,
mar Mammon krige alle ear,
dat Babel stiek de stêd yn brân
en liet it lân oer oan de wolven.

Hy leunt op ’t boek, sit nêst de gouden skalen,
de profeet, op slach fan tolven,
en swijt foarearst yn alle talen.

Rembrandt