admin

november 4, 2016

Sicht op groei

Lyrysk Deiboek

De tiden troch is ’t dien:
de swakken yn de ûnderwâl,
it gie net gau te mâl,
se binne fan har woartels snien.

Lykas de beammen dy’t
it oansjen misse: út balâns
foar wer in kreaze kâns
yn ljocht dat oan de himel stiet.

Lykas in peal sa rjocht
dy’t boppe wetter stiet, is ’t wier
dat yn it iepenbier
de swakke stiet yn ’t selde ljocht.

En keart de tiid troch sicht
op groei foar elk dy’t boppe komt,
dan wurdt de seage stom
en docht de grûn syn hâldersplicht.

november 4, 2016

Lyrysk Deiboek

Hoe sit it mei it bern?
It leit ús nei oan ’t hert
en stiet ús oan te sjen:
‘Soms rint it by jim net.’

Wy witte hoe ’t it sit
mei ’t leave maitiidsbern,
mar as de moardner sjit,
dan ha wy it ferlern.

Salang’t it lêste blêd
noch oan de tûke sit,
dan is der hoop, sy rêdt
it foar’t it har ferlit.

As triennen troch de froast
ferhurdzje, is ’t te let
foar ’t bern mei libbenstoarst,
de dea hat dermei ret.