Posted by admin

Lit de man yn grûn omreagje,
kolkje lykas in rivier
en witte fan gjin wet en wiken,
fan de bagger riist in pier,
hy hat in eigen byld foar eagen.

Sil de frou ’t mei weagen weagje
fan de see de ieuwen troch,
de kusten foarmjend, sa docht bliken,
ivich ekspressyf en sjoch…
sy hat de harmony foar eagen.

* Eugène Boch (1855-1941)
wie in Belgyske skilder,
dy’t yn 1886 yn de kunde
kaam mei Vincent van Gogh.

* Anna Boch (1848-1936),
in suster fan Eugène,
wie behalve yn de skilderkeunst
ek ynteressearre yn muzyk.

De rille rint him oer de lea
as hy de skonken oer de râne stekt,
de rest giet slop en stadich mei,
de kloeren binne him as dea,
hy fielt de druk, tinkt dat er lekt.

As jongste set er him teskrep
op bleate fuotten, mei in neaken liif
as pionier foar wer in dei,
hy is foarsichtich, want in mep
komt oan… fannacht wurdt er wer stiif.

* Magnus Enckell (1870-1925)
wie in Finske skilder, dy’t yn de rin fan syn karriêre
him begûn te ynteressearjen foar it neo-ympresjonisme.

* Pekka Halonen (1865-1933)
wie in Finske skilder dy’t betûft waard yn it skilderjen
fan lânskippen en natuerstúdzjes.