Posted by admin

By ’t rizen fan it grutte ljocht
sprekt noch de dize fan de nacht,
dy’t joech de boaten fracht,
by ’t kâlde toevjen fiskersrjocht.

Sy bringe boat en fisk oan ’t strân,
in hoeden kleurjen fan de moarn,
en sterk wurdt al de toan
as fisk giet rap fan hân nei hân.

De folle tiden toevje net
as folgen sy de loft en see;
foar ’t nachtwurk net mear ree,
ha sy de boaten heger set.

* William Turner (1775-1851)
makke skilderijen mei atmosfearyske effekten.

John Sell Cotman (1782-1842)
wie mei brede kleurflakken en krêftige foarmen
syn tiid fier foarút.

Hy is ferdjippe yn syn boek en bol,
hat krekt de nammen lêzen
fan Draak oant Grutte Bear
en boppe Lyra Herkules,
want mei de holle fol
sil ’t daliks wêze.

De himelbol giet fingerfluch yn ’t rûn
om sa de reis te meitsjen
fan Grutte Bear nei Draak
oer Herkules nei Lyra ta,
hy rekket fan de grûn
om thús te reitsjen.

Lyrysk jout er moarn syn les
allinnich mar oer Herkules.

It taffelskleed hat hjoed gjin funksje mear
of ’t binne no de hichten
fan Faals oant Eastenryk
en hûnderten yn Switserlân,
hy sjocht troch ’t finster klear
de fiergesichten.

Syn bestimming hat er fûn
mei beide fuotten op ‘e grûn.

* Johannes Vermeer (1632-1675)
Skilderij ‘De astronoom’
Skilderij ‘De geograaf’