januari 19, 2025
fan ûnbekend*
De hjitte oarloch wie foarby,
de stielen wapens swijden,
mar de reade fijân spile op,
dy’t gjin each foar frijheid hie,
syn macht mei striid útwreide.
Dogmatysk stribbe hy foarby
de grinzen fan de lannen
om syn reade klauwen út te slaan,
sadat de frijheid ûnderdie
foar macht en lei oan bannen.
Doe kaam in hiel oar lûd foarby,
gjin dogma, in doktrine
dy’t in libbenswize fierde op
fan frijheid, sawol wurd as die,
dêr koe elk him yn fine.
De kâlde oarloch brocht de kjeld
fan wapens dy’t noch swijden,
’t rûn út op stil geweld.
* Foto ‘Presidint Harry Truman’
januari 17, 2025
fan ûnbekend*
Wa wurdt net bliid fan dit gebiet,
in poarte nei rivieren
dy’t brûzje troch ravinen,
útsliten troch de stream,
al iuwen klinkt dit liet.
It binne wûnders yn in wrâld
dy’t iepen stiet foar dieren
as yn it hôf fan Eden,
de minske kin hjir sjen
’t gehiel yn mannichfâld.
Gods finster wurdt de berch wol neamd
om dêr in feest te fieren
seis dagen nei de skepping
mei ’t folk dat bliid fan aard
it liet sjongt mei de stream.
* Foto ‘Blyderivierspoort yn Súd-Afrika’