Posted by admin

Dêr stiet er dan, de nije kening
Leopold de Earste
yn it unifoarm fan generaal,
noch net yn hear en fear;
syn steat sprekt no in eigen taal,
en is mei Nederlân wol klear.

Neat hat er mei de âlde kening
Willem Baas de Earste,
sprekker fan de macht yn ’t generaal,
dy gie oer trije lantsjes gear,
want Benelúks wie syn ferhaal,
dêr’t hy fan tocht, it komt wol klear.

Dêr stiet er wer, de nije kening
Leopold de Earste
yn it unifoarm fan generaal,
no wol yn hear en fear,
die foar syn lân in hiele haal,
wat siert him foar de twadde kear.

* Liévin De Winne (1821-1880)
waard portretskilder fan it hôf
en de aristokrasy yn België.

** Ary Scheffer (1795-1858)
wie ien fan de bekendste
romantyske skilders fan syn tiid.

Wat libbet yn in bern
wannear’t de wrâld him lûkt?
It komt oerein om fier ts sjen
en harket, fielt en rûkt.

Sy hat dy tiid al hân,
is ier al op ‘en paad
mei heit syn geiten oer it lân
en siket middeis skaad.

Al oeren sit se stil
lykas de keppel leit,
’t ûntbrekt har oan in eigen wil,
omdat de heit it seit.

Mar yn de tiid werom
lûkt hiel it spul noch oan:
‘Sjoch om dy hinne, maat, en kom,
gean op yn ús fertoan.’

De kym is withoefier,
mar by har stean de hut
fan eigen fantasy en ’t dier
al ree fan kop oant sturt.

De ezels wurde wyld
as hynders yn galop
mei beide jonges ’t bernebyld,
folslein fan sturt oant kop.

* Gerard Bilders (1838-1865)
lit as skilder de oergong sjen
fan romantyk nei realisme.
Skilderij ‘Geitehoedster’